Hans en Janice, saamgevoeg deur God en gekies om mekaar se laaste in alles te wees.
Soos legkaartstukke voeg hul al hul lewensreise saam en word hierdie legkaart elke dag voltooi met meer ervaringe, herinneringe en gebeurtenisse. Hans en Janice pas perfek, hul onselfsugtige liefde vir mekaar, hul enorme omgee harte en hul toewyding aan mekaar en almal om hulle.

Rondom Upington het altwee groot geword en alhoewel hulle van mekaar geweet het, het die liefde eers net na skool in die hartjie van VanZylsrus vlam gevat. Hans se voete was behoorlik onder hom uitgeslaan en was sy eerste woorde aan Janice: "Hello, my trouvrou." So skop die twee se verhaal af en begin die twee herinneringe bou. Die uitdagings in hul verhouding het vroeg begin, want 'n paar maande later moes Janice haar tasse vir Gauteng pak. Die twee se liefde was egter sterker as 'n 1000km en saam het hulle aan nog 'n sterker band van ondersteuning en aanmoediging gebou.

In die Kalahari rooi duine met hul geliefdes om hulle het Hans op sy knieë gegaan en Janice gevra om sy vroutjie te word. Hulle lewensdroom word waar en word hul die grootste geskenk aan mekaar uit God se hand gegee. In haar oë is hy God se goedheid vir haar in menslike vorm. In sy oë is sy 'n bewys van Sy liefde en vrede en sal hy haar altyd liefhê sonder twyfel of rede.

Hans se eerste woorde word waar en hierdie twee wonderlike mense vier hulle spesiale dag op die 15de Maart 2025. Saam begin hul lewensreis met Jesus as hul fondasie en al hul geliefdes om hulle as ondersteuning.