Henro en Chané is onafskeidbaar saamgevoeg deur ons Hemelse Vader. 'n Liefdesverhaal word voltooi. 'n Lewenslange vriendskap wat begin het in Laerskool en in 'n sprokies-verhaal ontaard het.

 

Alles het begin in hulle matriek jaar (2018) met die woorde van Henro: "Chané jy moet saam met my ry want jy het 'n lisensie en ek nie." Net om agtergrond te gee, daar was baie van hulle vriende wat ook lisensie gehad het daardie aand. Min wetend dat Henro eintlik met 'n plan werk het hulle twee se veraltyd begin. Na skool gaan beide Pukke toe waar hulle verhouding net meer en meer definisie gekry het en hulle besef het dat hulle eintlik nogal baie in gemeen het. Hulle liefde vir die plaaslewe, diere en die belangrikste van als hulle liefde vir die Here het hulle net nader aanmekaar gebring.

 

Na 4 jaar se mooie herinneringe en op en af ry tussen The Heights en Kakoup (hulle ouers se plase) het Henro besluit om die knoop deur te hak. Op 29 Julie 2022 langs Kareedouw strand op 'n hoë rots met die mooiste uitsig oor die see, kniel Henro en vra sy "swartkop" om met hom te trou en sy lewensmaat te word.

 

Almal wat hierdie twee besonderse mense ken weet dat hulle twee mekaar perfek aanvul- ‘n legkaart wat voltooi is. Hulle was van dag een af onafskeibaar. Hulle verhouding en liefde vir mekaar is opreg en straal behoorlik na buite.

 

Julle het saam groot geword en nou gaan julle saam oud word. 'n Verhouding wat deur die Here goedgekeur is kan niemand verbrokkel of vernietig nie.